O se masina e lei mamao tele atu a o amata savalia lenei tausaga fou sa aliali mai ai ni faaletonu i le tautua a le kamupani vaalele o le Samoa Airways i le malaevaalele i Faleolo, ona o masini la’u uta ua faaletonu.

O le mafuaaga lea na lē faataunuuina ai nisi o malaga a le kamupani vaalele o le Air New Zealand sa faamoemoe e taunuu i Faleolo ma uta o oloa eseese ona ua leaga masini la’u uta.

Ua faaleleia nei lea faaletonu ina ua taunuu masini fou a le kamupani vaalele e fetaui lelei i vaalele lapopo’a e afea Samoa mo le la’uina o oloa mai Samoa ma oloa foi e taunuu atu i le atunuu.

E lē gata o le a faiofaaaoga masini la’u uta fou mo le Air New Zealand ae faapea isi kamupani vaalele o loo afea Samoa ia latou faigamalaga i aso o le vaiaso. 

Ua faailoa e le Pule Sili o le Samoa Airways le afioga Fauoo Fatu Tielu i le pepa o faamatalaga faalauiloa, o le taimi na tulai mai ai le faaletonu na fesoasoani le Malo o Niu Sila e ala i se galuega a Dr Trevor Matheson sa avea ma Komesina Maualuga o Niu Sila i Samoa, ma mafai ai ona faa’une atu se masini la’u uta a le Air New Zealand e faaaogā e le Samoa Airways.

Ua ave ai le faafetai a le Pule Sili i le Malo o Niu Sila, ae momoli ai foi le faafetai i le ofisa o le Malo o Amerika faapea le Malo o Samoa ona o le galuega ua mafai ona vave maua ai ni masini la’u uta fou se lua mo le auaunaga a le kamupani vaalele.

E 3 miliona tala le tau o ia masini na faatupe uma e le Samoa Airways.

Ua iai foi nisi meafaigaluega fou mo le auaunaga i le malaevaalele sa foai e le malo o Saina.

Ua fetaui le amata faaaogā o masini la’u uta na faatau mai Sepania ma tapenaga a le atunuu i le fono a Malo o le Taupulega, faapea isi malaga uma a vaalele tetele e fia ave ai uta o oloa mai Samoa, faapea oloa e fia auina atu mo le atunuu.