O le afioaga o Magiagi ua avea nei ma se tasi o alalafaga ua tuuina atu ma le atoatoa lana lagolago i taumafaiga e faasao ai le manulele a Samoa le Manumea.
Peitai o lea foi ua faailoa e le afioaga lana lagolago i polokalame o le faasao o le vaomatua e pei ona faamauina ai nei le 280 le tele o eka o eleele o le nuu o le a avea ma nofoaga faasao.
O ia fanua o loo iai vaitafe ma laau eseese faatasi ai ma ituaiga e 27 o manulele o loo nonofo ai.
O le tasi o vaega tāua o loo aofia i eleele e 280 eka ua avea ma nofoaga faasao o le fale o le fe’e o se mata’aga o loo iai i faamaumauga o talatuu ma tala o le vavau o Samoa.
O le faamoemoe maualuga o lenei taumafaiga ia iai se taimi i le lumanai ae faaopoopo ma faateleina eleele e aofia i le faasao ma atonu e fesootai ai ma le nofoaga faasao o le Pupu Pu’e o loo i le itu i Saute o le motu o Upolu.
O le tau faaiuiuga o le masina na tea nei o Aperila na faatuina ai le laupapa faailoilo e faailoa ai eleele faasao o Magiagi o se faailoilo o le a iloa ai e tagata tafafao mai fafo e fia afea ia eleele faasao aemaise foi o le tatou atunuu.
O nisi o tapu o ia eleele faasao o le faasā lea o taifau, e lē faatagaina ai ni tagata tutuli puaa aivao, e lē faatagaina foi ona agai iai tagata e ao mai ai ni laau eseese o loo ola i le eleele, ma e lē faatagaina ona ulufale iai ni tagata tafafao i Aso Sa.
