Ua faasilasila mai nei e le Kapeneta sa latou faaiuga ina ia faia se aso malolo e tasi mo le atunuu atoa o Niu Sila, e faamanatu ai le tuumalo o lana afioga i le Maiesetete le Tupu Tamaitai o Elisapeta II.
O le Aso Gafua, aso 26 Setema o le a avea ma aso malolo faapitoa mo Niu Sila. O le a leai ni taofiofiga poo ni faasāsāga mo pisinisi i lena aso malolo.
Ta’ua i le saunoaga a le Tamaitai Palemia, Hon Jacinda Ardern, o le a avea lena aso mo le toatele o tagata Niu Sila, latou te faailoga ai le tuumalo o le Tupu Tamaitai, ma faamanatu ai lona soifuaga ma lana nofoaiga.
O le Sauniga Faalemalo mo le maliu le State Memorial Service o le a faia i le Malumalu o St Paul i Ueligitone i lena lava aso, Aso Gafua 26 Setema, ma o le a faasalalauina i luga o le televise mo le maimoaina e le atunuu atoa.
Ua faamautinoa mai foi e Ardern o le a ia malaga atu i Peretania e avea ma sui o Niu Sila, faatasi ma le tamaitai le Kovana Sili o Niu Sila, ina ia auai atu i le falelauasiga o le Tupu Tamaitai o Elisapeta II i Lonetona. O le Aso Lulu, 14 Setema o le a tuua ai e Ardern Niu Sila mo Peretania.
Na saunoa Ardern, o lana malaga atu i Peretania, e le gata ina maua ai se avanoa e faaoo atu ai ana faaaloaloga e fai ai ma sui o le malo Niu Sila, ae o se avanoa lele foi e feiloai atu ai i le aiga lautele.
Na tuumalo lana Maiesetete, le Tupu Tamaitai o Elisapeta II i le Aso Faraile talu ai, aso 9 Setema (taimi Niu Sila), i le isi ona maota i Balmoral. O loo taoto nei lona tino maliu mo aso e fa i le Maota o le Malo mo asiasiga a i latou o loo fia faatino a latou fa’alo faaiu e faamavae ai i lana afioga.
O le sauniga o lona falelauasiga o le a faia i le malumalu tele mo le aiga tupu, le Westminster Abbey i le Aso Gafua, aso 19 Setema, o le aso foi lea o le a avea ma aso malolo i totonu o Peretania, e pei ona faasilasila aloaia ai.
