Ua oo atu nei i le 140 le numera o tagata i Samoa ua faafaigaluega e le kamupani o le FERO Samoa o se kamupani e tuufaatasia uaea mo masini ona faatau atu lea i kamupani i Niu Sila, Ausetalia, Kanata ma Amerika.
O le tasi lea o kamupani na ulufale mai i Samoa ina ua tapunia auaunaga a le kamupani o le YAZAKI sa pito to’atele o tatou tagata sa galulue ai.
I le iva tausaga i Samoa o le FERO ua faailoa i auala o faasalalauga a le faigamalo o tu nei i le foe, ua oo atu tupe ua tafe atu i le tamaoaiga o Samoa mai le tautua a lea kamupani i le 20 miliona tālā.
Ua faaalia o le tasi lea o manulauti o fuafuaga a le malo o le tuuina atu o le lagolago i taumafaiga a pisinisi ma kamupani faapea o loo maua ai galuega a o tatou tagata, ae o loo maua ai foi le malosiaga o le tamaoaiga mai a latou faiga faapisinisi e ala i le auina atu i fafo o oloa e gaosia i lo tatou atunuu.
Ua valoia e le FERO Samoa le siitia o lana auaunaga i Samoa i le isi 10 tausaga o muamua i le tulaga i oloa gaosi e pei ona tuufaatasia ai uaea o masini eseese o loo gaosia i fafo.
O le 140 o tagata faigaluega o loo galulue ai i le taimi nei i le kamupani, o loo fulisia i tamaitai.
O le vaiaso nei na asia ai e le Palemia ma nisi o Minisita o le Kapeneta le tulaga o loo iai le faagaioia o lea kamupani o loo faaaogāina nisi o fale tetele sa faatino ai galuega a le kamupani o le Yasaki i Vaitele.
