E le’i manuia taumafaiga a le alii o Jack Opeloge ma le tamaitai o Feagaiga Stowers mo le pine auro peitai na faamanuiaina i pine siliva mai ia la sii i taaloga o Mālō o le Taupulega.
O le alii ia Jack Opeloge na sii muamua ma na mata’ina lana finau mo se pine mo Samoa i le vaega o alii 109kg le mamafa. O lana sii mālōlō na ia ausia e 200kg le mamafa peitai i lipoti a le Samoa Global News na faailoa ai na toe logoina e faamasino le alii Samoa e lē taliaina lana sii lea (no lift).
Na oo ai ina faaaoga lana sii muamua lea e 194kg le mamafa mo le sii malolo ma maua ai le tuufaatasiga e 358kg lea na tulai mai ai loa i le tulaga lua.
Mo le tamaitai o Feagaiga Stowers e 268kg le tuufaatasiga o ana sii ma e fai si mamao mai le tamaitai o loo tulaga muamua ia Emily Campbell mai Egelani.
Ua tulai mai le alii o Petelo i le tulaga 4 mo alii i le super heavyweight class.
Ua mae’a le vaega o siisii uamea mamafa mo Taaloga o Malo o le Taupulega, ma tulai mai ai e 1 le auro ma pine siliva e tolu. Tula’i mai Samoa i le tulaga 16 o le faatulagana atoa.
