Ua oo i le sefulu ma le iva tagata maliliu i Niu Sila i lenei Kerisimasi ma le Tausaga Fou ona o faalavelave tau taavale.

O le tagata maliu mulimuli ua faamauina o le tagata e toatasi na maliu i le afiafi ananafi ona o le faalavelave tau taavale na tulai mai i le Far North, e tusa lea o le ‘afa o le ono i le afiafi.

I totonu lava o le aso ananafi o le isi o le tagata tietie pasika e pei ona lipotia mai Tauhei i le aoauli, e ese ai le isi tagata e toatasi na maliu i le taeao lava ananafi ina ua fetoai le taavale ma le poumolī i Coromandel.

O le itula e 6 i le taeao nei na faaiuina ai le piriota aloaia o faigamalologa e pei ona amata faitau mai le aso 22 o Tesema.

O le tausaga talu ai na faamauina ai le 21 tagata na maliliu ona o faalavelave lava tau taavale i taimi o le Kerisimasi ma le Tausaga Fou.