E tolu aso o loo faagasolo ai le valaauina o molimau e sefuluiva a leoleo e lagolago ai moliaga o le umia o paipa, o laau malosi ma le umia o le pauta faasāina o le ‘aisa, o loo tuua’ia ai Afualo Daryl Mapu o se tasi sa avea ma Sui Komesina o Faigapalota, ma se tamaitai sa galue ai i lea ofisa o Marie Fanueli.
O molimau amata o le su’esu’ega a le faamasinoga na valaau ai leoleo poo Malu o le Malo sa pu’eina ata o le fale le nofoaga na maua iai ia vaega i le osofa’iga poo se raid a leoleo na faatino i le faai’uga o le tausaga na te’a nei. O loo teena e Afualo Daryl Mapu ma Marie Fanueli moliaga a leoleo.
O lea tetee o loo autu i le finauga a loia o loo tula’i mo i laua le afioga Magele Leone Mailo ma Aumua Ming Leung Wai, o laau malosi, fana ma le ‘aisa faapea ma tupe na maua i le osofa’iga e lē o ni meatotino a i laua ua molia. O le afioga i le tamaitai faamasino o le Faamasinoga sili afioga Tafaoimalo Leilani Tuala Warren o loo seei i le su’esu’eina o molimau o lea faamasinoga.
