O le vaegatupe tele e $19 miliona Amerika, e tusa lea ma le 30miliona tala Niu Sila ua taunuu iai feutana’iga a le loia a le aiga o se alii Niu Sila sa fana e leoleo Amerika ma maliu ai, ua faailoa e le loia a le aiga o le faamaoniga lea o le telē o le sese ma tulaga lē sa’o na faatino e leoleo na faaooina le oti i lana client.
O lē ua maliu o Glass na soifua ane i Kalaiesetete ae na malaga ma lona aiga i Amerika ma aumau ai ae faatoa 10 ona tausaga.
Ua faamatala e se tasi ofisa faasalalau i Amerika o se aofai aupito telē lea ua faia a leoleo ma se isi itu i le setete lea o Colorado na tupu ai le faalavelave i le tausaga talu ai.
Ua lipotia na agai atu leoleo e toalua e tali atu i se valaau na oo ane i le 911 ina ua iai se faaletonu i le taavale a le alii o Christian 22 tausaga i lea taimi.
O loo lipotia sa iai ni aafiaga faalemafaufau na aafia ai le alii talavou i lea taimi ma o le mau a leoleo e lei usitaia e Christian a latou faatonuga e agai ese mai ma le taavale ma sa iai foi ia te ia ni auupega ma iu ai lava ina o latou fanaina o ia ma maliu ai lava mulimuli ane.
O le vaiaso nei i le mae’a o feutana’iga ma le finau a mātua o Christian mo le sailia o le amiotonu ua lipotia mai ai le vaegatupe tele lea o le a totogiina ane i le aiga.
Fai mai le tina o Christian, Sally Glass o se finauga umi lenei ma e tatau ona amata faagasolo loa le faamasinoga faasolitulafono e faatatau i le mataupu lea i le amataga o le tausaga fou.
O le itu tāua e pei ona faailoa e le tina, ua faamamā le igoa o si a la tama ua maliu fua e leai se agasala.
