E $181,365 tala le taulaga tupe o meaalofa na maua i le faamanatuina o le 130 tausaga o le Malumalu o le Ekalesia Faapotopotoga Kerisiano Samoa i le afioaga o Apia, lea sa faataunuu i le Aso Sa ua mavae atu nei e ala i se sauniga lotu faafetai sa faia lava i le Malumalu ua lauiloa i lona igoa o le Taimane o le Vasa Laolao.
O se tasi lea o vaaiga tuai o loo iai pea i le taulaga i Apia e manatua ai taimi o pulega faakolone seia oo ina tuto’atasi Samoa mai ia pulega.
O le sui ta’ita’ifono o le Ekalesia Faapotopotoga Kerisiano Samoa le susuga i le Toeaina Tunumoso Iosia sa fai ma sui o le ekalesia aoao e molimoli se faafetai i le aulotu ona o le faatāua pea o le tāua o le malumalu ma lona fausaga mai le amataga, e ui ua faia ni suiga i le toe faafou o nisi o vaega ae o loo tumau pea ona vaaiga i le 130 tausaga ua aulia.
Le sui ta’ita’ifono o le Ekalesia Faapotopotoga Kerisiano Samoa susuga i le Toeaina Tunumoso Iosia.
O sui o aiga o faafeagaiga ma o latou faletua sa tausia le aulotu EFKS i Apia ma nisi oo latou alo ma fanau, faapea aiga ma uo o le ekalesia sa auai i le faamanatuina o le 130 tausaga o le malumalu, o loo lagomau ai le ulua’i misionare o le lotu LMS na aumaia le lotu Kerisiano muamua i Samoa o Ioane Viliamu.
