O le tuuina atu o le fesoasoani faaletausaga a le malo mo a’oga uma i le atunuu mo lenei tausaga o le a iai se suiga.
O komiti o Fono Faavae a itumalo o le a galulue faatasi ma komiti a a’oga i le faasoaina o seleni o lea fesoasoani.
O se faiga ua faailoa e le Palemia o le a tumau ai pea ona faafoe mai le fesoasoani lenei e le matāgaluega o a’oga ma aganuu.
O le fesoasoani lenei a le malo e fuafua ai tupe e maua e a’oga i le aofa’iga o fanau o a’oa’oina ai mai lava i a’oga amata, o a’oga tulagalua ma a’oga maualuluga ma kolisi e lē gata i le malo, a o ekalesia ma a’oga tuma’oti faapea a’oga faamatātā eseese o loo faagaioia e nisi o ekalesia i le atunuu.
O tufatufaga o seleni o le fesoasoani i nisi o tausaga ua tuana’i e pito maualuga tupe e maua e a’oga a le Ekalesia Katoliko ona o le to’atele o fanau o loo a’o’oga ai.
O le fesoasoani lea a le malo na suia lona igoa i le One Government Grant poo le O.G.G. i le tausaga e 2019, ae o se polokalame fesoasoani na faavaeina e le vaega faaupufai e puipuia aiā tatau a tagata a o tumalo mai le tausaga e 1984 lea na amata i le limasefulu afe i le tausaga.
Ua faaauauina pea e isi faigāmalo ma siitia tupe ua faatino ai.
