I le 170 o tagata palota o le itumalo o Vaimauga 3 na lesitala i le palota muamua poo le pre-polling lea na faatino i le Aso Lulu, e na o le 122 tagata na palota muamua, ae toa 48 e lei palota.
E le o iloa le mafuaaga, ae o aiaiga o le Tulafono o faigapalota o loo faamalosia ai le tatau ona palota o tagata uma, latou ua lesitala i le lola palota a se itumalo.
Ua iai foi faasalaga ua aiaia mo i latou e le usitaia lea aiaiga. I falepalota e tolu sa faatino ai le palota muamua, ua faailoa e le ofisa o le komisi o faigapalota o le fale palota i le maota o le EFKS i Faatoia e 53 palota na faia ai, o le maota o le EFKS i Tanugamanono e 45, ma le maota o le EFKS i Vailima e 24.
O le aofaiga o palota na faia i fale palota ia e tolu i le palota muamua e 122. E le o faailoaina pe fia palota na maua e sui tauva e toatolu o loo faia iai le filifiliga a Vaimauga 3, ae faatoa iloa pe a oo ina faatino le faitauga aloaia.
E 72 pasene le aofaiga o tagata palota na lesitala mo le palota muamua na mafai ona faatino a latou filifiliga i le Aso Lulu, a o tālia ai le palota laititi a lea itumalo i le Aso Faraile o lenei vaiaso.
