E 17 tausaga le umi o le faasalaga faafalepuipui ua faia e le faamasinoga i se tamā e 38 tausaga le matua ina ua faamaonia lona ioeina o moliaga e fitu o le faiaiga faamalosi i lona afafine moni, faapea moliaga o le mataifale.
O le 12 o tausaga o le teineitiiti na aafia ai i gaioiga solitulafono a lona tamā lea ua tapu e le faamasinoga ona faailoa suafa ma soo se faamatalaga e iloa ai lē ua molia ma le afafine na aafia.
O le va o le masina o Aperila ma le masina o Me o le tausaga e 2021 na tupu ai le solitulafono e pei ona faailoa i le faai’uga tusitusia a le Faamasinoga Maualuga.
O se tasi lenei o matāupu tau solitulafono e aafia ai sootaga vāvālalata o se matua i lana fanau teine ua faaalia ai le faanoanoa o le faamasinoga, ona ua lē malu le puipuiga o fanau teine laiti i le lotoifale o lona aiga moni.
O se uso o le tinā o le teineitiiti na aafia na logoina leoleo ina ua iloa le gaioiga solitulafono ma o se gaioiga na ma’ito ai le teineitiiti, peita’i na fafano i ni masina mulimuli ane ai.
Na muamua tetee lē ua molia i moliaga a leoleo ae na alualu mana’o e ioe.
Peita’i ina ua valaau moliaga mo le su’esu’eina o molimau i le masina o Aokuso ae toe suia le tetee a le tamā i lona ioe i moliaga uma a leoleo e pei ona aumai ai le faasalaga e 17 tausaga i le falepuipui.
