E 13 moliaga o le faiaiga faamalosi, 10 moliaga o le mataifale ma le moliaga e tasi o le faatino o se faigaaiga faasolitulafono i lona afafine moni, na ioei iai se tamā ua 50 tausaga o lona matua ma ua faasalaina ai e le faamasinoga i le 16 tausaga i le falepuipui.
O Ianuari o le tausaga e 2022 na amata ai ona faia e lē ua faasalaina ia soligatulafono a o 15 tausaga o lona afafine moni.
Na faaauau pea ona tupu ia gaioiga a le tamā ia Ianuari ma Oketopa o le tausaga na te’a nei 2023, ma o le nofoaga na faatino ai ia gaioiga solitulafono o lo latou fale i le taimi ua tofafā le to’atele o le aiga i le po.
Faaalia e leoleo ia latou faamaumauga sa tuuina atu i le faamasinoga, o nisi o gaioiga a le tamā sa vaai iai nisi o lana fanau e to’alua ma o se faanoanoaga lea o le faamasinoga i lana faai’uga ona o aafiaga o mafaufau mu’amu’a o le fanau o loo laiti.
Na faailoa e le tina le to’alua o lē ua nofosala i le faamasinoga, o le tamā o le aiga o le lima taumatau lea i soo se atina’e i le tausiga.
E faapena foi se faamatalaga a le teineititi na aafia sa tuuina atu i le lipoti a le ofisa faanofo vaavaaia.
Faaalia e le teineititi e alofa tele i lona tamā auā sa tausia mai lava o ia a o itiiti peitai sa leai sona mafaufau e tupu se gaioiga o ni faiga matagā a lona tamā ia te ia.
O le 16 tausaga ua tuli e avea o se faasalaga faafalepuipui o le aofa’iga lea na totoe mai i tausaga e 22 na amata ai se fua a le faamasinoga i se faasalaga talafeagai.
E 12 masina na toesea ona o le tulaga i le amio ta’uleleia o le tamā a o lei tupu le solitulafono, 18 isi masina na toesea i le faatoesega, ma le loto salamō moni o lē ua nofosala faatasi ai ma se leleiga ua mae’a faatino ma lona aiga.
E 6 foi isi masina na toesea i le faasalaga na faia i le nuu, ma le 3 tausaga na toesea ina ua ioe lē ua molia i moliaga uma a leoleo.
O le asō na faatulaga e valaau ai molimau a leoleo na suia ai le tetee i le ioe o le tamā.
