Ua toe faaopoopo le isi pine a Samoa i taaloga laiti a le Pasefika ma ua maua ai le 16 o pine a le aumasii a le atunuu, lea e fitu pine auro, fā pine siliva ma le lima pine apa memea.
O le Aso Faraile na te’a nei i le mae’a o taaloga sa faia ai, na manumalo ai se tasi o le autaaalo i taaloga afeleti i le pine apamemea o ia lea o Jireh Otto Mickey Westerlund i le taaloga taufetuli o le 400 mita hurdles.
Ae i le taamilosaga lakapi ta’ito’afitu lona 34 a le kalapu taalo a le Malisi Sagato Iosefo, ua sola le ‘au a le Tamauli mai Savaii ma le Ipu o le siamupini ma le faailogatupe 15 afe tala, ina ua malolo ai le ‘au a Vaiala i ‘ai e 12 i le 14.
O lea foi ua faalauiloa ai ma se sailigatupe a le kalapu a le Malisi o se lūlū e manumalo i se taavale pikiapu fou, ma o le faamoemoe o seleni o le a maua i lea sailigatupe o le fesoasoani lea a le kalapu i a’oga uma a le Malisi i totonu o Samoa.
