Na ta’utino e le susuga Papalii Panoa Moala Tavita e 15 eka le telē o fanua o le NPF sa tapa atu lē sa avea ma Palemia ae o le minisita foi o tupe i lena vaitaimi, le susuga Tuilaepa Lupesoliai Sailele Malielegaoi, ina ia faamatuu atu se’i fai ai faailoga o le lulu a le latou ekalesia Katoliko i Siusega.
Ta’ua e Moala na ia faapea atu ia Tuilaepa e leai se afaina ae tatau ona totogi muamua atu fanua nei; peitai na saunoa Tuilaepa, o le a totogi mulimuli atu pe a maua uma tupe mai le faatauga o pepa o le lulu. E lei lelei lena tali i le mafaufau o le susuga Moala a o avea ai o ia ma Pule Sili o le faalapotopotoga o le NPF, ae mo lona ia foi puipuiga mai le gaioiga lē sa’o lea ua fai, sa ia iloa e tatau lava ona ave le mataupu i le Komiti Faafoe a le NPF o latou e faia mai le faai’uga.
Na talia e le Board le manaoga o Tuilaepa ma faamatuu loa le 15 eka. Na fai le lulu ma maua faailoga o tagata sa manumalo i fanua nei o le NPF. Ma na saunoa Moala, na amata ona aga’i atu tagata ia te ia mo fanua, ae o lana tali i tagata, e lē mafai ona ia faamatuu atu deeds o fanua, se’i vaganā ua uma ona totogi mai fanua e pei o lana tala na fai ia Tuilaepa.
Na fesiliga e le autusitala le susuga a Moala pe na totogi atu la na fanua, ae soisoi Moala ma faapea mai, e alu ese lava ina ua faamalolo ese o ia mai lona tofiga o le Pule Sili e ui e lei mae’a le taimi o lana konekarate, e leai ma se fanua na totogi atu. Na te lē o iloa la i le vaitaimi o le isi pule sili na sosoo ma ia, pe na totogi atu ai nei fanua e 15 eka le telē, ae i lona ia lava taimi, e aunoa ma se tupe na totogi atu e Tuilaepa ma le latou aulotu e tusa ai ma le tuutuuga na fai.
O nei ta’utinoga na faia e Moala e tali mai ai i tuua’iga a Tuilaepa na fai i sana ia foi feiloaiga ma le autusitala lea na ia ta’ua ai faapea na gau le NPF a o avea ai le susuga Moala ma Pule Sili.
