E 14 tausaga o se talavou ua pu’e faapagota e leoleo i le talepe fale na faatino a o momoe ni aiga i le po.
I lipoti mai le North Shore, Rodney & West Auckland e ala i se faasalalauga i luga o le latou upega tafa’ilagi le Facebook, na faamanino mai ai, na amata faatino su’esu’ega a le vaega Waitematā West Tactical Crime Unit i ni matāupu talepe fale na tula’i mai i le aso 27 ma le aso 29 o Setema i le faaitu o New Lynn.
Ta’ua o matāupu nei na maitauina lava e faatino i le leva o le po, i le taimi a o tofafā ai aiga.
Ta’ua e leoleo, o meatotino e tele ina ave faagaoi o masini faaneionapo (electronic goods) ma taavale o loo paka i luma o fale a aiga.
I se ata pu’e mai CCTV a aiga na maua ai ni tagata se to’alua o feoa’i ma taamilo solo i fale o aiga.
Na vave lava ona maua faamaumauga i ia matāupu, ma na maua ai loa ma le nofoaga i Ranui, e pei ona faatino ai e leoleo se sa’iliga e faaaogā ai se pepa faataga (search warrant), ma pu’e faapagota ai loa ma le alii talavou 14 tausaga.
Na faamaonia mai foi i faamatalaga le toe maua ai o meatotino na gaoia atoa ai ma taavale e 3.
O loo faasolo pea iloiloga ma sa’ili’iliga a malu o le malo i lenei matāupu.
E lua ni moliaga o le talepe fale o loo molia ai le talavou.
O loo i lalo nei i vaavaaiga a leoleo ma ua mae’a ona tula’i mo le ulua’i taimi i le faamasinoga a le Waitākere Youth Court lea alii talavou.
Puna o Faamatalaga: https://www.facebook.com/share/p/19YKL4BH8e/
