O le faamanatuina o le 13 tausaga o faia pea le auaunaga a le kamupani vaalele a le Jetstar i faigamalaga I totonu lava o Aotearoa, ua ofoina ai e le kamupani vaalele ni malaga fua e aunoa ma se totogi, o se tasi o vaega o le faamanatuina o le ausia o ia tausaga o lana auaunaga.
Faailoa i le Newshub le tuuina e le kamupani vaalele i soo se tagata Niu Sila ua silia ma le 18 tausaga o le soifua, i latou na soifua ane i le aso 10 o Iuni, le avanoa e maua ai se voucher 100 tala mai le kamupani vaalele e faaaogā mo faigamalaga.
Ua amata foi i le asō a latou faapitoa i pasese pa’ū mo faigamalaga i nisi o nofoaga e 16 i totonu o Niu Sila ma faigamalaga faavaomalo e aofia ai Ausetalia ma Rarotonga. Fai mai e amata pasese i le 24 tala mo faigamalaga I totonu o le atunuu ae o faigamalaga faavaomalo e amata i le 125 tala Niu Sila e pei ona faamaonia e le kamupani vaalele i le lipoti.
Fai mai le Ofisa Sili o le kamupani vaalele, Gareth Evans o le faamanatuina o le aso fanau o le kamupani vaalele ua faia i se taimi ua toe vaaia ai le siitia o le aofai o tagata malaga aemaise ina ua faamāmā le tele o vavao na iai o le faama’i ma ua toe amata malaga tagata i atunuu eseese mo faigamālōlōga ma tafaoga talu mai le taimi umi na faia ai vavao o le faama’i.
O faapitoa o le aso fanau e amata i le vaeluaga o le po ananei seia oo i le ta o le 12 i le po a taeao.
