Ua sailia nei e le Matagaluega o Faamasinoga ma le Faafoeina o Mataupu tau faamasinoga ni faamasino fou mo le Faamasinoga o Fanua ma Suafa, ina ua iai nisi o faamasino ua malolo litaea mai le galuega.
O fuafuaga tau tupe a le Malo e pei ona pasia ma amata faamamalu i le tausaga faaletupe ua savalia nei, ua sii ai totogi o faamasino o lea faamasinoga.
O le faasalalauga a le matagaluega i le sailia o ni faamasino fou o le faamasinoga o fanua ma suafa ua faailoa ai ma faamanuiaga tau totogi mo faamasino o le a filifilia i le aofaiga e $123,600 tala i le tausaga.
O se totogi ua aofia ai le alauni o telefoni e $3,600 tala i le tausaga ma le alauni o femalagaa’iga i le tausaga e $5,000 tala.
O totogi fou ia ua tau vasaga tutusa ai faamanuiaga tau totogi ua maua nei e faamasino o le Faamasinoga o Fanua ma Suafa, ma faamanuiaga o loo maua e faamasino o le Faamasinoga o Soligatulafono.
O le aso 26 o le masina nei o Aokuso e tapunia ai le avanoa mo nisi e fia talosaga i avanoa o faamasino o le Faamasinoga o Fanua ma Suafa.
O loo tatala le avanoa mo tagata uma e lei ausia le 68 tausaga o le soifua e talosaga ma le aiaiga tāua ia umia se suafa matai ua uma ona lesitala faaletulafono, o loo nofomau foi i Samoa ma o loo i totonu o faiganuu, ia lē silia ma le tolu tausaga.
