O le aso muamua o Ianuari o le tausaga e 2021, ua silia ai nei ma le lua tausaga talu ai na tulai mai ai se faalavelave ogaoga i le afioaga o Afega, ina ua tagatavaleina ni tama se toalua i se gaioiga na faaaoga ai se laau malosi o se fana laititi o le ituaiga o le 22 milimeter pistol.
Na molia ai e leoleo se tamā ua 69 nei tausaga o lona soifua o ia lea o Vaotuua Neemia Auleoleo, ma sa ia ioeina moliaga e lua o le fasioti tagata pa’ivalea ina ua toe faaui i tua e leoleo ia Oketopa o le tausaga na tea nei moliaga o le fasioti tagata faamoemoeina.
O le Aso Lulu o le vaiaso nei na faatoa aumai ai le faaiuga o lea solitulafono ma ua faasala ai Vaotuua i le 12 tausaga ma le 6 masina i le falepuipui, ae e toesea ai mai lea faasalaga masina ma aso na nofo taofia ai i le vaaiga a leoleo a o tālia se faaiuga.
E 25 tausaga na amata ai le fua a le faamasinoga i se faasalaga ae na toesea le isi 12 tausaga ma masina e 6 ona o itu lelei e faasino i le tamā matua ua amata tuli nei lona faasalaga i le toese i Tanumalala.
O ia itu lelei o lona ioeina o le solitulafono, faia o le ifoga i aiga o tama e toalua na maliliu, faia o le sala i le nuu, ma o se tagata e lelei tele i totonu o lona aiga.
Faaalia e leoleo na mafua ona tupu le faalavelave i le aso muamua o le tausaga fou 2021, ina ua agai atu le taavale sa iai ma se tasi ua maliu ma nisi taulelea, ae fetaui ma le solomuli o le taavale a lē ua nofosala i luma o le latou fale, ma lafo ai e lē ua maliu ni upu masoā i lē ua faasalaina.
Na fesili Vaotuua Neemia i lē ua maliu pe iai sana agasala ua lafo atu ai ia upu masoā, ae na oso i fafo ma le taavale lē ua maliu[a1] ma savali atu ma tu’i le tamā matua.
Na palasi i lalo Vaotuua ua matapogia ae na toe maua si ona malamalama ma ia tago ai loa i le laau malosi ma faapena ona agai e saili le na faia le gaioiga ia te ia.
Na oso ane se tasi o taulealea o le isi tama na maliu ai i le faalavelave, i le taimi o loo talanoa Vaotuua i le tuaa tamā o lē na tu’iina o ia.
Faaalia e leoleo na tago ai i le laau malosi lē ua molia ma fana ma lavea ai le fatafata agavale o le tama muamua lea na maliu. O le tama lea e toafa lana fanau.
O le taimi ua agai i le isi itu o le auala lē ua faasalaina ma le aupega, na ia vaaia ai lē na tu’ia o ia, o agai atu ma nisi o taulelea o le nuu. Sa ia ta’i iai le laau malosi ma faapa ma lavea ai le fatafata agavale.
Ta’ua e leoleo, na palasi i lalo ae na toe faapa atu le isi ututau ma lavea ai le pito i tua o le ao poo le ulu o lē na maliu mulimuli.
Ua faamatalaina e le faamasino le afioga Tafaoimalo Leilani Warren le gaioiga na faia e Vaotuua o se taumafaiga e tagatavale ai nisi i se gaioiga ua sili ona ogaoga.
O se solitulafono foi na faia i se nofoaga faitele a o molimauina e nisi o le afioaga.
