I le tuana’i o le 3 tausaga ma masina e iva talu ona suaina le eleele e aloa’ia ai le fausia o se isi nofoaga mo le taaloga soka i le malaetaalo o le Apia Park, o le vaiaso nei ua faamauina le tatala aloa’ia ai o lea galuega e pei ona sa malaga mai ai le sui Pelesetene o le FIFA, le faalapotopotoga o loo pulea lea taaloga i le lalolagi.
O le FIFA foi na faatupeina le fausia o le nofoaga e pei ona iai se faletaalo, lea sa faaaogā i le taligamalo o le Fono a Malo o le Taupulega ia Oketopa.
O le faauuga ma le laugatogi foi o le faai’uga o a’oa’oga a fanau o le kolisi o Robert Louis Stevenson, sa faia ai i lea nofoaga i le amataga o le vaiaso nei ina ua mae’a ona ooti le lipine ma tatala aloa’ia le galuega e le Sui Palemia ma le sui Pelesetene o le FIFA.
O le faaaogāina o le vaega i Sisifo o le malaetaalo o le Apia Park e le taaloga soka o se fuafuaga na faatino i le taimi o le faigamalo talu ai, ma o le faafetai lea a le Pelesetene o le faalapotopotoga soka a Samoa i le ta’ita’i ma le faigamalo sa tula’i mai i lea vaitau.
O le tau o le galuega e 12 miliona tala, ma o se tasi lea o taumafaiga ua faamauina le maoa’e o se seleni ua faaalu ai a se faalapotopotoga tau taaloga i Samoa.
O le faalapotopotoga o le soka ua mautū foi ona malaetaalo ma nisi o fale ua mae’a fausia i le malaetaalo i Tuanaimato.
