O le Aso Faraile nei o le a auina atu ai taga talo e 100 i luga o le vaalele i Niu Sila.
O lenei faamoemoe sa saunoa ai lē o loo taitaiina lenei auaunaga, Seuamuli Kome Lauano o le Faatonu a le Le Faatoaga Samoa i Niu Sila.
“O lenei taumafaiga o loo matou galulue faatasi ai ma le vaega o faatoaga le Afioga foi i le Minisita ia Laaulialemalietoa Polataivao Fosi Schmidt e fesoasoani ai i nai a tatou faifaatoaga.
“E tolu la a’u uta talo ia ua mae’a fuafuaina mo le faaiuga o le masina nei masina o Iuni ma Iulai e tilotilo ai poo manuia le taumafaiga.”
Ua faia foi se faigapaaga a lenei faipisinisi ma nisi o afioaga e tauala atu i faifaatoaga auā lenei faamoemoe.
“E fā afioaga mai Upolu nei e aofia ai ma Savaii o le a amata atu ai e trial mo le taimi muamua.
“O vaega nei e ao ina mataituina, o le ituaiga o le talo piniki ma le talo samasama, ma ia faamalosia pea a tatou faifaatoaga e totō le talo.
“Ua silafia foi le unai a le tatou Matagaluega o Faatoaga, e toe foi o tatou tagata e galueaina fanua e totō ai meatoto.”
O le auga lava o lenei taumafaiga o le fesoasoani lea i faifaatoaga i le tulaga tau seleni.
“O le aso lea o le a tapena ai taga talo e selau e fuafua mo le auina atu i le vaalele mo Niu Sila, ma o le aso foi lea e totogi sa’o ai lava faifaatoaga e toafitu ia la amatalia lenei faamoemoe e ala ia latou taga ia o le a auina atu i Niu Sila.
“E manaomia lava le fresh o le talo pe a auina atu e pei ona iai se tasi foi o container talo sa taunuu atu a o lei faia le Eseta o le tausaga nei e siaki atu talo ua mātūtū ma tele ina lē faaaogāina.”
“O lo’u la popolega i lea itu o nai faifaatoaga ma latou tautiga i aso uma e timuia ma laina e totō le talo ia fua lelei a lea e faaletonu pe a taunuu atu.
“Ona ave lea o talo ia ua lē faaaogāina i isi faleoloa e faatau ai o le mea e tupu e faatau e fale ia i se tau laititi.”
O le polokalame ua faataatia e Seuamuli, o le Aso Lulu e ao ona fafai ai talo, Aso Tofi ua fua i Atele ona ave sa’o lea i le malaevaalele i Faleolo mo le auina atu i Niu Sila auā le faamoemoe o le faalauiloa a le Le Faatoaga Samoa i le vaiaso fou aemaise ai le faamanatuina e tagatānuu Samoa o loo alala i Niu Sila le Tutoatasi.
