Ua mautu le fesoasoani a le Malo o Saina o le a fausia ai le kolisi poo se a’oga maualuga o le a a’oa’oina ai le tomai i galuega faaleoleo poo se Police Academy, e pei ona sa mua’i talia lea fuafuaga e le faigamalo talu ai, ma ua faaauau e le faigamalo fou ua tu nei i le foe.
Ua faailoa e le Minisita o le Matagaluega o leoleo, falepuipui ma le ola toe fuata’ina i taualumaga a le Palemene i le vaiaso na tea nei, e to’a selau tagata faigaluega mai Saina o i latou e iai tomai tau inisinia i le fausia o lea galuega tele o le a malaga mai i Samoa mo le faatinoina o lea galuega. Na faamautu le fesoasoani lenei a lea Malo tele, i le malaga talu ai nei a le Minisita o le Va i Fafo o Saina sa afea ai lo tatou atunuu.
Sa tuai faatino tapenaga o le fausia o lea a’oga faaleoleo ona o le tapunia o tuaoi faavaomalo o atunuu i le pepesi malosi o le Koviti-19 i le lua tausaga talu ai. O se vaega o le fanua i Tafaigata sa iai le falepuipui ua tapunia o le a faatu ai lea a’oga ma le faamoemoe o le a a’oa’oina ai alii ma tamaitai o le a ofo lo latou ola ma le soifua e tautua le Malo ma le atunuu i le tomai faaleoleo.
