Ua faia siitaga o totogi i lo tatou atunuu e fesoasoani ai e tau faafetaui le sii o le tau o le soifuaga lea e faapea na mafua mai ona o le faamai Koviti-19.
Peitai e lē o iai se siitaga i le totogi o pasese mo tagata malaga i pasi la’upasese ma taavale laiti la’upasese i lo tatou atunuu.
Ua sefulu ai nei tausaga talu mai le siitaga o pasese mo ia auala o femalagaa’iga mo tagata lautele i le tausaga e 2014, e lei toe faia ai lava se siitaga.
E ui e lei toe iai se faaopoopoga i le totogi o pasese mo pasi ma taxi ae ua faailoa e le Pulega o fela’ua’iga i luga o le laueleele ua tele faaseā ua oo atu mai nisi o le atunuu ona ua sili atu le pasese e totogi ua tāpā e le au avetaavale laiti la’upasese ma avepasi.
O loo tagi uu le aufaipasi ma pisinisi taxi i le taugata o le tau o totoga o taavale ua iai, aemaise le tau o suauu ma penisini, ma o le latou tatalo i le Malo, ua oo mai le taimi ua tatau ai ona toe iloilo se siitaga o totogi o pasese.
O loo iai le aiātatau i tagata malaga i pasi ma taxi e tāpā ai le lisi o le faatulagaga o pasese ina ia faamaonia ai le sa’o, ae afai ua sili atu le tupe o le pasese ua totogi o lona uiga ua solitulafono.
