Ua faatonu e le Kapeneta le faalapotopotoga o le malosi tau eletise e ala i sana faai’uga ina ia faatino se maliega ma le kamupani o le Mitsubishi Heavy Industries mo le okaina ma le fausia o totoga faaleoleo poo spare parts o afi eletise suāuu e 4 o loo i Fiaga.

O lea faai’uga o loo faailoa ai le tau fuafua mo ia totoga faaleoleo e tusa ma le 2.5 miliona tala mo le afi e tasi ma e faaalu ai se vaegatupe e tusa ma le 10 miliona mo afi e 4 i Fiaga.

Ua fautuaina ai e le Kapeneta le faalapotopotoga tau eletise ina ia silasila i se fuafuaga mamao poo se long term plan mo le tausia lelei o ia afi poo le tulaga i le maintenance.

Faato’ā 13 tausaga talu ona faaaogā afi fou suāuu i Fiaga pe a fua i le 30 tausaga e mafai ona oo iai le umi o loo lelei pea mo le faaaogāina, peitai ua faaalia e le Ofisa Sili o le malosi tau eletise i le feiloa’iga a tusitala ma le komiti faufautua o galuega lavea’i i taimi o faalavelave matuiā, lea na faalauiloa ai e le ta’ita’ifono o le komiti le afioga i le Palemia le poloa’iga o faalavelave faafuase’i mo le 30 aso ua amatalia nei, ua silasila le pulega i se faiga e lē toe aafia ai afi e pei ona mafua ai ona faaletonu le auaunaga tau eletise i Upolu.

O le faai’uga a le Kapeneta ua faatonuina ai lea faalapotopotoga a taunuu totoga faaleoleo o afi, ia faatino auaua’i le galuega mo le faaleleia o afi, ia fua i le taimi e avanoa ai, ma le taimi e taunuu ai totoga faaleoleo.