E foliga o se tupe tele, ae o le tau faapupulaina mai e le afioga i le Sui Palemia, Tuala Tevaga Iosefo Ponifasio faapea foi le susuga i le failautusi aoao a le pulega a le Toa Samoa, afioga Tuiletufuga Fritz Tuiavii, o vaega uma e faatupe e lena seleni, ua mautinoa o ituaiga aofaiga na o tupe faaalu ai.
O le aso 28 o Tesema ua faatulaga ai le malaga a le vaalele ua totogipau e ave ai le ‘au a le Toa Samoa se’i feiloai i le tapuaiga a Samoa o loo tu’i mai le mulipapaga i le atunuu. Pe afai o le fuafuaga lena e lele sa’o le vaalele mai Ausetalia i Samoa, faatasi ai ma isi uma feuiuiaiga o mea o le a faatino mo tama i lea malaga atoa e aofia ai lo latou apitaga ma feoaiga uma i Samoa, lea la e tilotilo ai i le aofaiga lea e $1.5 miliona tālā Samoa.
Peitai o loo iai foi le naunautaiga o le mamalu o Samoa o loo alala i Niu Sila ina ia afe mai le malaga se’i feiloai Samoa i Aotearoa i le ‘au, o lea la na ta’ua ai e tilotilo i le $1.7 miliona tālā Samoa le seleni e ono moomia ai.
E lei mautinoa le fuafuaga o le afea o Aukilani e le malaga, o loo ave le talosaga i le kamupani vaalele i se avanoa e afea ai Aukilani ma malolo pe 6 i le 8 itula. Afai ae taunuu lea faamoemoe, o loo iai foi fetuunaiga ma le mamalu o Samoa i Aukilani i se nofoaga e taulalata i le malaevaalele i Magele e faatino ai se faaafe mo le ‘au i totonu o na itula a o lei toe faaauau le malaga i Samoa.
Sa iai le avanoa i le Mt Smart mo lea faamoemoe peitai ua faalēaogāina ona o toe fetuunaiga o aso ma taimi o le malaga a le ‘au aemaise foi e fai sina taumamao ese mai le malaevaalele pe a fua i le umi e ono afea ma malolo mai ai le ‘au i Aukilani.
Mo le malaga i Samoa, o le a faamautu le ‘au i le faletalimalo tumatafaga o le Return to Paradise i Matautu Lefaga, ma faagasolo ai nisi feoaiga a le ‘au, ma ua faatulaga foi le malaga atu o le ‘au i le motu tele i Salafai ina ia faamautinoa e maua uma e le mamalu o Samoa aemaise nai aiga, le avanoa e faatalofa ma luluaao e ma le Toa Samoa.
Na saunoa Tuiavii, ua mae’a tapena le latou pepa faatalosaga poo le proposal e tuuina atu i le Kapeneta mo se fesoasoani a le Malo i le avatua o le ‘au i Samoa, ma sa faamaonia e saunoaga a le Sui Palemia lena gaioiga.
Peitai e le o nofonofoa’i ai foi le pulega a le ‘au, o le a amata ona fuafuaina ni fundraising poo ni suegatupe, ma poo le ā lava se aofaiga o se tupe o le a maua mai nei sailiga seleni, ona faaatoa loa lea e le Malo le aofaiga atoa mo le malaga a le Toa Samoa.
Sa faailoa ai foi e le failautusi, o le afioga Faimalo Allen Stowers ma le PacificEzy Money Transfer lea ua muai sii lona aao e amatamea i se sailiga seleni o le a alo atu i ai le ‘au i le vaiaso fou, faatasi ai ma le lagolago a le TV1 a Samoa.
E iai le faamoemoe e tele nisi pisinisi ma faalapotopotoga o le a soosoo tau’au ane i lenei faamoemoe, aemaise o le faanaunauga lea o loo iai i soo se Samoa na mitamita ma faagaeetia i le iuga o taaloga a lana Toa Samoa, ia mafai ona malaga atoa le ‘au ma lana pulega ia faafeiloai mai e le Malo ma le atunuu, ae momoli atu ai foi sa latou faafetai i le tapuaiga a Samoa atoa.
