O le taaloga siisii u’amea mamafa ua mautinoa o se tasi o taaloga ua tu maualuga ai le igoa o Samoa e lē gata i atunuu o le Oceania ae faapea le lalolagi.
Ua tele pine ua manumalo ai ‘ausiisii a le atunuu e masii i tausinioga faavaomalo e pei ona faamauina o le tatou pine siliva na maua i lea faaagatama i taaloga a le Olimipeka.
O le masina fou o Aperila mai le aso 25 e oo i le aso muamua o Me o le a talimalo ai Samoa ma le faalapotopotoga siisii u’amea mamafa a Samoa i le taamilosaga o le IBFC Universal Cup, ma ua tuuina atu ai e le malo lana lagolago malosi i lea taamilosaga siisii u’amea mamafa a le lalolagi e ala i le fesoasoani tupe e tasi le miliona luaselau afe tālā.
O se tasi lea o i’ugafono a le Kapeneta i lenei vaiaso sa faailoa e le Palemia, ma o le Aso Tofi o lenei vaiaso o le a faalauiloa aloa’ia ai lea taamilosaga ma faailoa ai foi ma pisinisi ua latou lagolagoina.
O le ta’ita’i o le malo i le Palemia o le a saunoa e faailoa aloa’ia le faamoemoe i se sauniga e faia i le nofoaga tutotonu o le faalapotopotoga o taaloga a Samoa le SASNOC o loo i Tuanaimato.
