O le iai nei o Samoa ma nisi o motu o le Pasefika i le tau o afā poo le cyclone season e pei ona amata i le masina o Novema e oo atu i le masina o Aperila o le tausaga fou 2025.

Ua faailoa ai ni popolega o le alii Polofesa lagolago poo se associate Professor o  Nicholas Ling o le Iunivesite o Waikato i Niu Sila, i ni aafiaga i le siosiomaga o le gataifale o nuu ma afioaga o le motu o Upolu o loo goto ai le vaa su’esu’e o le fitafita a Niu Sila le Manawanui.

Ua faaalia e lea polofesa i mataupu tau le ola faalenatura o meaola ma laau o le laueleele ma le sami, e tatau ona faanatinati le galuega e aveesea ai suāuu mai le vaa o le Manawanui auā a iai ni matagi malolosi e avea ma afā e tula’i mai, e mafai ona faaleagaina ai le vaa su’esu’e ua goto ma salalau ai ma suāuu o loo i luga o le vaa.

O loo faavae lea manatu o Polofesa Ling i le ogasami o loo goto ai le Manawanui e papa’u, ma e faigofie ona osofa’i e galu faapea ave malolosi o le sami i le taimi o se afā, ma avea ai ma avanoa e masaa ai i fafo le tele o suāuu o loo i luga o le vaa.

Ua faailoa foi e lea polofesa i le lipoti a le leitio a Niu Sila o le malosi o se afā e mafai ona vaaia ai galu maualuluga ma āu malolosi e mafai ona faaleagaina ai le a’au ma o se isi lea itu sili ona faigata i le tula’i mai o ni uiga ma’ema’e o le tau i le taimi lenei o le tau o afā.

Ua faailoa e le ofisa o le vaaitau e lua ni afā e ono aafia ai Samoa peitai e maualalo lava le tulaga e ono tula’i mai ai se afā.

E 950 afe lita o suāuu sa i luga o le Manawanui ina ua goto i le aso 7 o le masina na te’a nei o Oketopa.