I le tele o tausaga sa galue ai le tinā, le susuga Papalii Dr Viopapa Annandale Atherton i le tomai faafoma’i e lē gata i Peletania ae na faaauau i Samoa ina ua foi mai ma faamautū ma lona aiga i lo tatou atunuu, ae o se tasi o tinā sa auauna i nisi o faalapotopotoga tuma’oti mo tinā ma tamaitai e lē gata i totonu o Samoa ae o le Pasefika.

O le a manatua lea tausala ma tinā o le atunuu i lana tautua faafoma’i ina ua faamānavaina e le Matai Sili ana galuega i le ola nei, i le 84 tausaga o lona soifua.

O se tinā sa avea foi ma sui o le faalapotopotoga o le Pan Pacific and South East Asia  Women’s Association, o le Mapusaga o Aiga, o le nofoaga o loo vaaia ai tagata ua aafia i le gasegase o le mafaufau, le Goshen Trust Mental Health services, ma o ia foi o se sui o le Samoa Voyaging Society ma le asosi o foma’i, le Samoa Association of General Practitioners.

O lana auaunaga faafoma’i  tuma’oti o loo silafia e le to’atele sa latou faaaogāina lana tautua, ao iai lea auaunaga i se maota i le magafa i Matautu uta i Apia.

O ia o se tasi o fomai sa faapitoa i ma’ito o le itupa o tamaitai.