O le a’oga tulagalua i Vaigaga i le itumalo faapalota o Faleata Numera 2, ua avea ma a’oga muamua i le atunuu ua iai le potu e faapitoa i le a’oa’oina o tomai o fanau i le faaaogāina o le masini computer.

Na faailoa lea matati’a ua ausia e le a’oga tulagalua i le saunoaga faafetai a le Pule A’oga i le faletupe o le lalolagi, ma le malo o Samoa i le galuega ua mae’a fausia ai le falea’oga fou o le a’oga tulagalua a Vaigaga i le tau e 6 miliona 500 afe tala. 

O se galuega sa tatau ona amata fausia i le tausaga e 2020 faasolo mai i le 2021, peitai na taofia le faatinoina o le galuega i le taimi o le faigamalo sa iai.

Na toe tuliloa poo iai pea le fesoasoani a le Faletupe o le Lalolagi e pei ona filifilia e lea faletupe faavaomalo le a’oga a Vaigaga e toe fausia lona falea’oga i le polokalame o le faaleleia o falea’oga e tali atu ai i suiga ogaoga o le tau.

O Tesema o le tausaga na te’a nei na amata ai ae na mae’a i le masina o Iuni o le tausaga nei.

Sa iai nisi o tapenaga sa aiaia e tatau ona faatino pe a mae’a fausia le falea’oga, o le mafuaaga lea na faato’ā tatala aloa’ia ai i le faai’uga o le masina na te’a nei o Aukuso.

Le Minisita o le Matagaluega o Puna’oa Faalenatura ma le Siosiomaga, Afioga Toesulusulu Cedric Schuster o le saunoaga autū o le tatalaina o le falea’oga tulagalua fou o Vaigaga.

Sa maua foi le avanoa o le Minisita o A’oga ma aganuu e saunoa ai ma momoli ai lana meaalofa mo le potutusi foi o le a’oga tulagalua.

Le afioga Seuula Ioane o le Minisita o A’oga ma Aganuu.

E ono masina na fausia ai le falea’oga tulagalua fou a le nuu o Vaigaga.