Ua tuua’ia e nisi o leoleo le Komesina, ua ia gaoia lo latou lumanai.
Ua liki mai i tua le imeli a le Komesina ia Andew Coster ma lipotia e le leitio a Niu Sila mananatuga o le Komesina i auala e teuteu ai pasene o loo toesea mo Super a leoleo, ina ia maua ai le avanoa e fetuutuunai ai le leoleo i le maualuga o le Super e toesea mai lona totogi seia oo lava i le leai o se pasene e toesea mo le Super.
O se fuafuaga e faapea ia faafetaia’i ai le lē manuia o le finau a leoleo i o latou totogi lea ua sau le faai’uga ua manumalo lava le ofo a le malo.
I lea imeli o loo ta’ua ai e Coster o loo vaavaai e faia suiga i le 7.5% lea o loo faamalosia le tatau ona toesea mai le totogi o le leoleo ae alu agai i le Super, ma o se suiga o le a tatala ai le avanoa e pule ai lava le leoleo i le suiga o le pasene e mafai ona toesea e aofia ai ma le mafai ona filifili e leai se mea e toesea, peitai e lē o aveesea ai le agavaa pea i le 10.184% lea o loo totogi e le fale faigaluega.
E leai se tali a le faaulu o le asosi a leoleo Chris Cahill, ae i lipoti a le leitio a Niu Sila e iai leoleo e lē o fiafia i le imeli ma le tala, e faavalevalea lea manatu, ona atonu o loo faigata i le taimi nei peitai o tupe nei e faamoemoe iai le litaea.
Puna o Faamatalaga: Police pay deal: Commissioner’s advice to cut super payments ‘foolish’ | RNZ News
