O le Aso Lua o lenei vaiaso fou ua umusa ma fufui pe tuu ai i le sami le fautasi fou o le nuu o Apia, o se tasi o tapenaga o polokalame o le faailogaina o le 100 tausaga o le taaloga lakapi i totonu o Apia, e pei ona faaigoaina le kalapu lakapi a le afioaga o le Apia Maroons.
O le Aso Sa na faia ai le sauniga lotu i le malumalu o le ekalesia faapotopotoga Kerisiano Samoa i Apia ma sii ai le fautasi i gataifale o le nuu e sauni ai mo le faapaiaina ma umusa.
O nisi o polokalame o lenei vaiaso o se taufetuliga e amata mai i le malumalu tapua’i o le Faatuatuaga Baha’i i Tiapapata ma aga’i atu i Afiamalu i le fanua o loo lagomau ai le susuga Laauli Alan Grey, o se tamalii o le nuu sa tele lona sao i le atina’eina o le taaloga lakapi i totonu o le nuu.
O le Aso Tofi o le solo ma le savali faaaloalo a le kalapu lakapi a le Apia Maroons i le taulaga lea o le a auai nisi o tamafanau a le afioaga sa lotolotoi i le lakapi, aemaise o loo auai se aumalaga o tamafanau a Apia mai atunuu i fafo.
E taualuga le 100 tausaga o le lakapi a Apia i le taamilosaga lakapi o le King and Queen e faia i le malae taalo o le Apia Park, ma le malae taalo o le kalapu lakapi a le afioaga o Vaiala sa latou faailoga foi le 100 tausaga o le taaloga lakapi.
