Ua amata nei se suesuega i le mae’a o se mataupu ua lipotia ai le uma o le ola o se pepe e tolu masina i le falemai o Tamaiti i Aukilani i le taeao analeila.
O le faamatalaga mai leoleo e pei ona ta’ua e le Televise tasi ua ta’ua ai o le pepe na aveina atu i le falemai i Middlemore i le Aso Sa aso 18 o Setema i se tulaga tigaina.
Na aveina ane ai lea i le falemai o tamaiti mulimuli ane ae lipotia mai i le taeao analeila ua uma lona ola.
Ua faailoa i le lipoti e 31 tausaga o se alii ua molia nei i le faaoomanu’a faamoemoeina ma ua fuafua e tatau ona tulai i le faamasinoga i Manukau i le aso 17 o le masina fou.
Fai mai leoleo e ono faia nisi moliaga faaopoopo, e le o faailoa maia le mafuaaga o le maliu o le pepe ae o loo faagasolo pea suesuega.
