O le feau lea o le petition ua tuuina atu nei i le malo e faatalosagaina ai le tatau ona faia o tulafono e sili atu e puipuia ai fanau mai le tagofia o le vape.
O le aoauli ananafi na savalia ai e se kulupu o mātua e tusa lea ma le 30 ma o loo tutū malosi i lenei feau, maota o le Palemene ma tuuina atu lenei talosaga, lea e silia ma le 13,000 i latou na sainia.
O le feau mai mātua ia faia ni tapulaa i le auala o loo faatauina ai vaping products i totonu o Niu Sila ma ia tau lava foi na o faletalavai e faatau mai ai, faapei o Ausetalia.
O le faipule o le Labour o ia foi o le faatonusili o le Health Select Committee, Tracey McLellan lea na taliaina mai lenei petition ma ina ua fesiligia i vaega o le tulafono o loo iai i le taimi nei e faatatau lava i vaping products, na ia saunoa o loo galulue pea iai le malo.
I faamaumauga e tusa ma le 20% o tupulaga talavou i lalo o le ta’i 18 tausaga lea e tagofia le vape i aso taitasi.
