Ua faailoa e le Matagaluega o le Soifua Maloloina ma le Komiti o Faalavelave Faafuasei le ausia ai o le 95 % o le vaega o tagata matutua ua maea le tui muamua ae ua 83% le aofai o i latou ua maea uma tui puipui e lua.
O lenei faamaumauga na faamauina ina ua maea le tūiga tele lona lua a le atunuu lea ma faagasolo i le Aso Faraile na sei mavae atu nei. I ia faamaumauga i tulaga o pasene o le itupa o alii ua fai le tui muamua e to’a 60,176 ae o tamaitai e to’a 56,565. A faaopopo faatasi nei fainumera ona maua lea o le 116,741 tagata ua maea le tui muamua.
O le aofaiga o i latou ua uma tui e lua e to’a 101,116 ma ua aofia ai alii e to’a 52,071 ae o tamaitai e to’a 49,045. E le’o faailoaina mai e faamaumauga nei na faailoa lautele mai e le Ofisa sooupu o le Mālō i le faaiuga o le vaiaso pe o le a se aofaiga o fanau mai le 12 – 17 tausaga le matutua ua maea le tui muamua o le Pfizer ae toafia foi ua maea tui e lua.
Ua lipotia e 11,000 tagata na mafai ona oo iai le tūiga i le vaiaso na te nei ma o le faamoemoega a le Mālō ma le matagaluega ae faapea le Komiti faafoe o faalavelave faafuasei ina ua ausia le 100 pasene o le maea atoatoa o tui puipui o tagata o le atunuu ina ua mautinoa le saogalemu mai le faama’i o le Koviti19.
