O le amataga o le vaiaso nei ua tuvae mai ai i fanua le Tausala o Samoa ma o le Tausala foi mai Niu Sa Uelese nei, Moemoana Safaato’a Schwenke ma ua vaaia i upega tafailagi ata o le taimi na tuvae ai i le malaevaalele i Sini ma faafeiloaia e le mamalu o Samoa na potopoto ai i le taeao o le Aso Sa.
Vaaia i ata i upega tafailagi le sagisagi fiafia o aiga ma uo aemaise le atunuu ma avanoa mo le faafeiloaia o le tamaitai Tausala i lona toe foi mai ai i fanua a o lei tapena atu mo le tausaga atoa o le a galulue faatasi ai ma le ofisa o Tulisi i Samoa i le faalauiloaina atili o le atunuu ma le faataunuuina o ona tiute faa le Tausala o Samoa 2023/2024.
Sa faaleo foi i luga o upega tafailagi le agaga faafetai o le peresetene o le Miss Samoa NSW i le lagolago a aiga ma uo aemaise Samoa i Niu Sa Uelese i le tapuaia o le tamaitai o Moemoana i le tauvaga sa faatautaia i Samoa na iu manuia ai lona taumafai.
Na faia faafiafiaga a le Matavai Pacific Cultural Arts faapea nisi sa iai i le faataliina o le taunuu mai o le tamaitai Tausala i le malaevaalele faavaomalo i Sini.
