Ua tuumalo se tasi o tamali’i sa lotolotoi i upufai o le tatou malo e ala ile tofi faipule o le Palemene le afioga Faumuina Faaolatane Tiatia Liuga, sa uluai pale i le tofi faipule o le itumalo o Palauli le Falefa i le maea o le palota tele o le tausaga e 2001.
O se tasi lea o sui faipule na filifilia e tauaveina le tofi Minisita o le Kapeneta i lona faatoa ulufale i upufai o le malo ma o se Sui Faipule sa lagolagoina le vaega faaupufai e puipuia aia tatau a tagata.
Sa avea ai ma Minisita o Galuega Tetele, avea ma Minisita o Tupe, ma ave foi ma Minisita o le Matagaluega o Punaoa Faalenatura ma Siosiomaga.
O se tasi o tamalii o le atunuu sa tele tausaga sa galue ai i totonu o Malo Aufaatasi lea sa faamautu ai i totonu o atunuu e pei o Iraq, Filipaina, Sudan, Fiti, Bangladesh, Vietnam, Georgia, ma Pakistan.
Sa toe tauva i le tofi o lona itumalo i le palota tele i le tausaga e 2021 ae e lei manuia. E tuumalo le afioga Faumuina Faaolatane Tiatia Liuga, ua 79 tausaga o lona soifua.
