O tuuaiga i lafoga faailogalanu e se tama taalo fou sa filifilia i le kalapu liki a le Sydney Roosters ia Spencer Leniu, faasaga ia Ezra Mam o le ‘au a le Brisbane Broncos ua pisipisia ai le talaaga o le taamilosaga a le NRL i taaloga muamua ua faia i Las Vegas i Amerika i le aso ananafi.
Sa taofia e le alii laufali Adam Gee i le 69 minute o le taaloga, ma tuuina ai Leniu i le lipotia mo le faia iai o se suesuega ona o se faitioga aloaia mai ia Mam.
Sa faaalia ai e Gee, sa faitio ia Mam i se lafoga faailogalanu a Leniu sa faia i le taimi o fetuleiaiga i le va o tama taaalo.
Faaalia e le alii laufali, e lei faalogo i sea lafoga faailogalanu, o le mea lea, o le a tuuina i le lipoti, ma o le a faia iai se faaiuga mulimuli.
I le masini faasalalau mai i le taaloga sa faalogoina ai ia Mam o fai i le laufali, sa faaigoa o ia e Leniu o se manuki, ma le isi tama taalo a le Broncos sa ia faaalia, sa ia faalogo o faaigoa ia Mam o se manuki.
O Leniu, le sui o le Toa Samoa, sa fesiligia i faatalatalanoaga i le mae’a ai o le taaloga ma Triple M e uiga i lea tuuaiga ae sa ia faaalia, e talitonu o lea mataupu e gata ai ii.
O le tama taaalo Apoliki lauiloa a le Rabbitohs, Latrell Mitchell, sa ia tusia ai i luga o lana upega o fetusiaiga a le Instagram lona lagolagoina o Mam, ma ia tapa ai le NRL e faia se gaioiga iai.
O le faiaoga a Brisbane o Kevin Walters sa ia faaalia, e tutumau ia Mam i lana faitioga ae o le kapeteni ia Adam Reynolds sa ia ta’ua, e na te lei faalogo i se lafoga a Leniu e pei ona tuuaia ai o faia i luga o le malae.
Ae sa lipotia ai, o tama taaalo a le Brisbane Broncos sa latou faafeto’aia Spencer Leniu i le faletalimalo o faamautu ai e tusa ma lea lafoga.
O ‘au e lua sa nonofo i le faletalimalo e tasi i Las Vegas i le fogafale e tasi, e pei ona ta’ua ai, le vaaia o Leniu o le Roosters ma Kotoni Staggs o le Broncos o felafoai ni a la faamatalaga e uiga i lea mataupu, ae lei savavali i fafo ia Mam ma Pat Carrigan ma le potu o le ‘au.
Lipotia ai, o le pule o le Roosters sa ia tosoeseina Leniu a o lei faateteleina le vevesi.
Sa manumalo le Roosters i le Broncos 20-10, le isi taaloga o taaloga e lua sa faia i le malae lava e tasi a le Allegiant Stadium, uluai taaloga a kalapu liki a le NRL ua faia ai i eleele o Amerika.
O le isi taaloga sa manumalo ai le Manly Sea Eagles i le South Sydney 36-24.
