E silia i le vaiaso o le a iai le ta’ita’i o le Malo le afioga i le Palemia, afioga Fiame Dr Naomi Mataafa i totonu o le atunuu o Saina i se valaau faaaloalo a ta’ita’i o lea malo, o se paaga totino a Samoa o le a atoa i le tausaga fou le 50 tausaga o lana faigauo faavaomalo.
O le aso 20 o le masina nei o Novema e oo i le aso 28 o lenei lava masina o le a iai le tamaitai Palemia i lea malo.
O le taimi muamua lea ua afio ai le afioga i le Sa’ofaapito i lona tulaga o le Palemia o Samoa i sana malaga faalemalo i Saina talu ona tula’i i le foe o le ta’ita’iga o le Sa o le malo o Samoa i le tofi Palemia.
Ua faailoa i se faasalalauga mai auala o fesoota’iga tau televise a le malo o Saina, o le asiasiga taualoa a le ta’ita’i o le malo o Samoa o le a feiloa’i atu ai i le Palemia o Saina ma isi ta’ita’i ma faia talanoaga i mataupu tau i le va o malo e lua.
