O se tasi o mataupu sa toe afea i le avanoa na fesiligia ai e nisi o le autusitala le minisita o loo iai le vaaia o le poloketi o le miliona, o le vaegatupe e 175 afe tala mo le itumalo palota o Faasaleleaga 2 mai le miliona muamua, lea ua faailoa e le sui faipule o le ta’ita’ifono o le Fono Faavae a lea itumalo, ua faamalieina le Komiti Faafoe o le poloketi i le lipoti a le tausi tusi i le faaaogāina o lea vaega tupe, ma ia teena ai le finagalo o le Minisita na ta’ua ai ua toe faamatuu vaegatupe o le miliona tala lona lua mo lea itumalo, ina ua mae’a ona totogi atu le 175 afe sa fesiligia le faaaogāina. 

Le tofa Lagaaia Ti’aituau Tufuga o le minisita o loo iai le vaaia o le poloketi tasi le miliona e pei ona faagaioia e lana Matāgaluega o Tina ma Tamaitai Atina’e o Afioaga ma Agafesoota’i.

Sa toe fesiligia le sui faipule o Faasaleleaga 2 i sona finagalo e tusa ai o le tumau o le minisita i lana mau sa toe totogi uma e le faipule ma le Fono Faavae lea seleni.

Faaalia e le afioga Magele Sekati Fiaui, e tatau i le minisita ona ia faailoa ni mau e faamaonia ai lona finagalo.

Ua faaalia foi e le faipule o Faasaleleaga 2 o le a ia faamanino vaega uma i le taimi ua sauni e talanoa mai.