Ua teena i se faaiuga a le faamasinoga le talosaga a Talalelei Pauga ma lana loia o Josephine Fuimaono Sapolu, lea sa finau ai e faasee ese le tamaitai faamasino o le Faamasinoga Maualuga le afioga Niava Mata Tuatagaloa mai le suesueina o moliaga o Pauga, moliaga ia o le taupulepule e faaoo le maliu i le susuga Tuilaepa L Sailele Malielegaoi, sa avea ma Palemia o le atunuu.
O loo tuua’ia o ia i lona faatupe o le gaioiga sa taupulepule ai ma Lema’i ma Malele e faaoo le maliu.
Sa tuuina atu e le loia a le itu talosaga ni mau e lagolago ai le finauga e faasee ese le faamasino, e pei o le mau e faapea e pito tasi le silasila a le faamasino i le suesueina o mau o le a tuuina atu ona sa lē mafai ona tuuina atu ni vaega o faamaumauga o le faamasinoga na suesue ai mau faasaga i moliaga o Lema’i Faioso Sione ma Malele Atofu Paulo lea o loo tuli faasalaga ina ua faamaonia o la moliaga o le taupulepule e faaoo le maliu ia Tuilaepa.
O le silasila a le faamasinoga i mau na tuuina atu e lagolago ai lea finauga, e matuā leai se sootaga ia Talalelei Pauga ona o se laulau o faatonu na suesueina molimau o le faamasinoga o Lema’i ma Malele, ae o Talalelei Pauga na faato’ā molia ia Setema o le tausaga na te’a nei, ina ua aumai faapagota mai Ausetalia.
E fai foi le faamasinoga o Lema’i ma Malele ma faia le faaiuga o loo iai pea i Ausetalia Pauga.
O le teena o le talosaga e faasee ese le faamasino, na silasila ai le faamasinoga i ona atugaluga sa folasia faalauaitele a o faagasolo lenei mataupu, o le toe tulai o le tamaitai loia o Josephine Fuimaono Sapolu e finau le moliaga o lē ua molia, ae o le tamaitai loia sa ia lagolago le talosaga e tatala ai i tua Pauga ina ia avatu lē ua molia la te nonofo i lona aiga, a o faagasolo lona faamasinoga.
O le fesili sa fia tuliloa se tali i lea tulaga, pe iai se aafiaga o ni fesootaiga poo se conflict of interest i lē ua molia ma lana loia pe afai o loo nofo ai ona o se aiaiga o le tatala i tua.
Sa avatu le folasaga a loia a leoleo o le latou vaai e leai se aafiaga, ma o le finauga foi lea a le loia o loo tulai mo lē ua molia, lea sa finau ai e tele foi isi loia e toe tulai lava mo o latou taitoalua ma tagata o o latou aiga.
Peitai na faaalia e le faamasino le afioga Niava Mata Tuatagaloa i lana faaiuga tusitusia, e lei tupu i se faamasinoga le nofo o se tagata molia i se loia i ni aiaiga o le tatala ai i tua e faatali lona faamasinoga.
E manatu le faamasino atonu e tatau ona iai se talosaga aloaia e tuuina atu e silasila iai le faamasinoga i sea tulaga ona faia ai lea o se faaiuga.
O le masina lenei o Me ua faatulaga e suesueina ai molimau a leoleo e lagolago ai le moliaga o Talalelei Pauga.
