I se tala lata mai o le pepesi o le faama’i korona vairusi poo le Koviti-19 i Samoa ua faailoa e le matagaluega o le soifua maloloina, e talu mai le aso 2 i le aso 4 o Me poo le Aso Gafua i le Aso Lulu o le vaiaso na te’a nei, o loo tumau pea le numela o tagata ua maliliu i lo tatou atunuu ona o auga o le faama’i, i le 20, ae e iai nisi o maliu sa resitala e faapea mai le lipoti a le soifua maloloina ua lē faamaonia e isi ni sootaga i le Koviti-19.

O faamaumauga o le aso 2 i le aso 4 o Me e to’a 449 i latou ua maua i le siama o le Koviti-19 ma oo atu ai le aofaiga atoa oi latou i le atunuu ua aafia i le faama’i i le 10,583 ae o le aofaiga atoa o tagata ua pesia i le siama talu ona salalau i le lautele o le atunuu le faama’i i le aso 17 o Mati ua 10,659.  

E to’a sefulu o loo faanofoesea i nofoaga faapitoa i le maota gasegase i Motootua. E leai ni faamaumauga mai le lipoti lata mai lenei na faatoa tuuina mai faalauaitele i le po o le Aso Sa pe iai ni gasegase o le faama’i o taofia i potu tigaina. O le aofaiga atoa o suega poo test ua mae’a ona fai e 77, 714. O le ogatotonu o le vaiaso nei e tatau ona maua mai ai se lipoti o le fitu aso o faamaumauga o le pipisi o le faama’i.