Talu lava ona va le fogavaa o le vaega faaupufai o loo tauaveina le pulea o le Malo, ma tula’i mai foi le fefaaalia’iga o finagalo o ta’ita’i o pati faaupufai e lua ma le ta’ita’i o le pulega faatonu i le tamaitai Palemia, i le lē toe faatuatuaina o le ta’ita’iga o fonotaga a le Palemene e le Fofoga Fetalai, o loo molimauina ua lē o toe nofonofo faatamala pati faaupufai ia latou tapenaga mo le isi palota tele a le atunuu o loo sosoo ai nei.
I le vaega faaupufai e Puipuia Aiātatau a Tagata ua mae’a ona fālē le lotoifale o le latou tapenaga i ni ta’ita’i e finauina le isi faigāpalota tele.
Ua tula’i mai i lea faiga filifiliga o loo mau pea le toovae i sui faipule o le faafaletui a lea vaega faaupufai e faaauau pea le ta’ita’iga a le sui Faipule o Lepa ma le sui Faipule o Anoamaa 2 i le tauaveina o le ta’ita’iga o le pati i le isi faiga filifiliga a Samoa e toe sa’ili ai sui usufono o itumalo faapalota e 51.
I le vaega faaupufai o le Faatuatua i le Atua Samoa ua Tasi, o le Aso Faraile na usuia ai le latou fonotaga i Savaii sa auai sui faipule ma le aulagolago o le vaega faaupufai lea sa faatino ai ma le lesitalaina o sui lagolago.
Ua faailoa foi i upega tafa’ilagi a lea vaega faaupufai nisi o sui faatutū ua momoli atu auā tapenaga o le palota tele o sosoo ai nei a le atunuu.
