O Fepuari o le tausaga na te’a nei 2024 na faamaonia ai e le Faamasinoga Maualuga i se faai’uga se laulau o faatonu le moliaga e tasi o le toso teine o se tamā ua 56 tausaga le matua, ae na faato’ā aumai le togisala a le faamasinoga i le aso 16 o Tesema o le tausaga na te’a nei.

O le Aso Gafua o le vaiaso nei ua faato’ā faailoa ai i upega tafa’ilagi e faasalalau ai mataupu tau faamasinoga le faai’uga tusitusia o lea moliaga tau solitulafono lea ua faasala ai le tamā 56 tausaga le matua i le 66 masina i le falepuipui poo le 5 tausaga ma le 6 masina.

O lē ua faasalaina e iai ona vaa fagota e lua ma o le vaveao o le Aso Sa na usu ai lona to’alua ma lona afafine laitiiti e faatau i’a, ae tupu ai le solitulafono ina tuua nao ia lo latou fale ma le teineitiiti 17 tausaga le matua na aafia.

O lē na aafia o le niece o le to’alua o le tamā ua nofosala i le falepuipui.

O le silasila a le faamasinoga i le solitulafono o se ata manino lea o le lē malu o alo ma fanau teine laiti i soligatulafono faapenei o loo tutupu pea ma aliali mai i totonu o nisi o aiga o le atunuu.

O le faamamafa foi lea a le faamasinoga i ana faasalaga pe a faamaonia ni solitulafono tau faiaiga faamalosi e pei ona faatino i lenei mataupu.

Sa faailoa e lē na aafia i le faamasinoga a o iloilo sana faai’uga ua mae’a ona toe teuteu le mataupu ma sa talosagaina ai se faasalaga e leo le falepuipui, peitai e le’i talia e le faamasinoga.

O le faai’uga na taunuu iai le faamasinoga e iva tausaga na amata ai lana fua i se faasalaga, ae ona o le sala na fai i le nuu ma le toe teuteu o le va o lē na molia ma le aiga o le teineitiiti na aafia aemaise o le faato’ā molia lea o le tamā 56 tausaga i se solitulafono, na toesea ai le 3 tausaga ma le 6 masina.

Ua totoe ai le 5 tausaga ma le 6 masina ua avea ma faasalaga faafalepuipui lea ua toesea ai ni masina ma ni aso sa taofia ai a o faagasolo su’esu’ega a leoleo.