Ua talia e le Faamasino o le faamasinoga sili, le afioga Fepuleai Ameperosa Roma le talosaga a loia a leoleo mo se taimi e faamautū ai a latou tapenaga i moliaga o se taulealea 21 tausaga le matua o Faleatiu, o loo molia i lona aveese faamalosi o se teineititi 17 tausaga le matua.
O le masina na te’a nei o Oketopa na salalau ai i le api o foliga le talosaga a se tasi o le aiga i le fia maua o se fesoasoani e sa’ili ai lea tamaitai talavou.
O le toe momoli ai o le teineititi i lona aiga e lē na aveina na pu’eina ai e leoleo le taulealea o Willow Lealofi Faisauvale ma molia i le gaioiga na ia faia.
O le aso 14 o Novema e toe tula’i ai i le faamasinoga lē ua molia, ma e tatau ona oo atu iai ua mautū moliaga a leoleo ma tuuina atu ai loa se tali i moliaga.
O le tamaitai loia o Beth Onesemo o loo tula’i mo le taulealea ua molia i lea mataupu tau faamasinoga.
