O le tagi e ala i se su a lē sa avea ma Loia Sili a le Malo le afioga Savalenoa Mareva Betham Annandale, ua ia finauina ai e solitulafono le faai’uga na faamuta ai lona avea ma Loia Sili, na suesueina e le Faamasinoga Maualuga i le Aso Gafua o lenei vaiaso.
O lenei mataupu tau faamasinoga na tulai ai lē ua tagi mo lana molimau tuu fofoga ma avanoa ai loia o loo tulai mo le Palemia o loo tuua’ia e fesiligia le afioga Savalenoa.
Sa tulai foi le tamaitai Palemia afioga Fiame Dr Naomi Mataafa, e molimau e tetee ai tuua’iga ua faasaga atu ia te ia i lona tulaga o le ta’ita’i o le Malo ma le faai’uga na faamuta ai le avea o Savalenoa ma Loia Sili a le Malo.
O mau a le itu tagi sa tuliloa ai e loia mo le itu o loo tuua’ia faai’uga a Savalenoa a o ia tauave le tulaga Loia Sili mai le taimi ina ua mae’a le palota tele o le tausaga 2021, lea na faaumiumi ai ona vaaia le atunuu e le Malo tausi le caretaker government, ma mea na tutupu ma aliali mai ai e pei o mataupu na oo i le faamasinoga na saili ai le tulaga faaletulafono o le faatautoga i le fale’ie, le 10 pasene o nofoa o tamaitai i le Palemene, o le poloaiga a le Ao o le Malo na tolopo ai le faatautoina o sui faipule o le paeaiga lona 17 a le Palemene, ma le poloaiga a le Faamasinoga Maualuga na faatonuina ai le tauaofia o le Palemene e faataunuu le faatautoga o sui na filifilia mai le faigapalota tele o le 2021.
I le molimau tali a le Palemia i moliaga a le itu tagi faasino i mafuaaga na faia ai lana faai’uga e faamuta le tofiga Loia Sili o Savalenoa, sa tutumau lona finagalo i mafuaaga na faavae ai le faai’uga, ina ua leai se faatuatuaga ona o nisi o gaioiga sa faatino e lē ua tagi ina ua mae’a nisi o faamasinoga ma see atu le faigamalo a le Faatuatua i le Atua Samoa ua tasi e tauave le pulega o le Malo.
O se faamasino mai fafo o loo seei i le tauaveina o suesuega o lenei mataupu tau faamasinoga, ma ni loia mai fafo o loo finauina mau a le itu tagi, ma mau a le itu o loo molia.
O loo aofia ai ma nisi o loia sinia i lo tatou atunuu o loo lagolago i tapenaga a itu auai o lenei faamasinoga.
