O le asō lea e tulai ai i le faamasinoga i Ausetalia nei se tamaitai mai Kanata o loo molia ma feta’ua’ina i lona aumaia faananā o le 14.4 kilo o le fualaau faasāina o le aisa e nanā ai i totonu o ana uta.
O fualaau faasāina ia na masalomia e le Border Force ina ua taunuu mai le tamaitai lea e 24 tausaga o lona soifua, i le malaevaalele i Brisbane i le Aso Sa, na malaga mai Fiti.
Fai mai na amata mai lana malaga mai Vancouver i Kanata ae o le aisa na maua i se pepa plastic ua saisai i ni solo taele ua faasusū i le vineta ma ufiufi i fatu o le kofe.
O le faasalaga aupito maualuga o ia ituaiga soligatulafono pe a faamaonia o le soloatoa i le falepuipui.
Fai mai pe ā ma le 13 miliona le tau aofai o le fualaau faasāina pe a faatauina.
Puna o Faamatalaga: https://www.9news.com.au/national/woman-charged-over-allegedly-attempting-to-smuggle-14kg-of-meth-into-australia/bef71a72-082e-498e-9630-dccaef2d6c67
