O le faamutaina o le tofiga Pelesetene o le Faamasinoga o Fanua ma Suafa o le afioga Letufuga Fepuleai Attila Ropati, e solitulafono ma ua lē ogatasi ma aiaiga o le Tulafono Faavae.

O se vaega lea o le faaiuga a le Faamasinoga Maualuga a le atunuu sa iloiloina finauga faaletulafono ma mau sa tuuina atu e loia, ina ua su’esu’e le tagi a le afioga Letufuga sa ia suina ai le Malo i le faamutaina o lana tautua i le tofi Pelesetene o le faamasinoga o fanua ma suafa.

O le Aso Lua o le vaiaso nei na faailoa ai le faaiuga a le faamasino mai Niu Sila o Justice Witten KC na su’esu’eina le mataupu lea sa faagasolo ona taualumaga i le aso 27 ma le 28 o le masina na te’a nei o Me.

E 3 miliona na finauina e le itu tagi e avea o se taui ma le totogi o isi aafiaga o lē na talosaga i le faaiuga na faamuta ai lona tofi Pelesetene, peitai ua taunuu le faamasinoga e totogi atu na o le $750,000 tala o se taui mo le itu tagi poo se compensation.

Sa finauina e Letufuga Fepuleai Attila lona toe foi atu e tauave le tofiga Pelesetene o Faamasinoga o Fanua ma Suafa e pei ona sa avea ai lē o loo seei nei i le tofiga ma se tasi sa molia i le tagi, peitai o taualumaga amata o le faamasinoga na faia ai ni fetuunaiga i le va o loia a itu auai ma toe faaui ai i tua lea vaega o le finauga a le itu tagi.

E silia i le 200 itulau o le faaiuga tusitusia o lenei mataupu tau faamasinoga lea o loo fofola ai vaega uma o finauga a loia a le itu na faauluina le mataupu ma loia a le Malo.

O le Loia Sili ma se tasi o loia sinia sa tulai mo i latou na molia e aofia ai le Palemia, o le Malo, ma le Pelesetene o le Faamasinoga o Fanua ma Suafa.

O loia sa tauaveina le finauga a le itu tagi o le afioga Fuimaono Sefo Ainuu ma le afioga Faimalomatumua Mathew Lemisio.