Ua toe faaauau ona faamatuu atu vaegatupe o le poloketi o le miliona tala i le Fono Faavae a le itumalo faapalota o Faasaleleaga Numera 2, ina ua mae’a ona toe totogi e le ta’ita’ifono ma le Fono Faavae le vaegatupe e 175 afe tālā sa fesiligia lona faaaogāina, ae o se tupe sa faamoemoe e mo alauni ma totogi o le aufaigaluega o loo faatinoina galuega o atina’e.
Sa faamaonia mai e le Minisita o loo ta’ita’ifono i le Komiti Faatonu o le poloketi, le tofa Lagaaia Ti’aituau Tufuga, ua mae’a ona toe totogi uma le seleni sa fesiligia, ma ua toe faaauau ai ona faamatuu atu vaegatupe o le poloketi mo lea itumalo faapalota i le motu tele i Salafai.
O le amataga o le vaiaso nei sa faamautu ai maliega a nisi o Fono Faavae a itumalo palota mo le amata faamatuu iai o vaegatupe o le miliona lona 3.
O itumalo ia e aofia ai Faleata tasi, Palauli tasi, ma Aiga i le Tai.
Faaalia e le Minisita o le poloketi i lea tufatufaga e lē toe faatuai ona faamatuu vaegatupe ina ia vave faatino atina’e ae o le itu e sili ona tāua, ia faamaoni i le faaaogāina o seleni ma ia tapena mae’ae’a lipoti o le su’egatusi i le faaaogāina o le miliona tala.
Le Minisita o le Matagaluega o Tinā ma Tamaitai Atina’e o Afioaga ma Agafesoota’i o loo vaaia le poloketi o le miliona, le tofa Lagaaia Ti’aituau Tufuga.
