Ua sefululima nei tausaga talu ona vaaia muamua i Samoa le meaola o le mongoose lea sa masalomia na mafua ona oo mai ona o pusaoloa o fesoasoani o le galulolo poo le sunami na afaina ai nisi o nuu ma afioaga i le atunuu.
O lea meaola sa vaaia i le nuu o Satitoa ma sa mafai ona pu’eina i mailei sa aumai i Niu Sila.
O lea foi ua toe oo mai le mongoose i Samoa e pei ona sa vaaia i le nofoaga o le pulega o le suavai i Vaitele, ae o le tulaga lelei ua mafai ona pu’eina i se mailei.
E lē o iloa pe na faapefea ona ulufale mai i le atunuu lea meaola, ma o le mafuaaga lea o le aumai i se tulaga faalaua’itele o se fautuaga mai le Matagaluega o Puna’oa Faalenatura ma le Siosiomaga, ina ia logo atu le matagaluega pe afai o vaaia le mongoose i ni nofoaga e tu lalata i le nofoaga na maua ai.
O le lapata’iga mai lea matagaluega a le Malo ua galulue faatasi ai ma le vaega o meaola faalafuā i le ofisa tutotonu o le siosiomaga o le Pasefika, mo le sailia poo iai nisi meaola faapea o iai pea, e ese mai le mongoose ua maua ma ua faatama’ia.
O se meaola e faaeteete gatā tele i lana amio ona na te osofa’ia faamoega o manulele ma isi meaola.
Faaalia e le matagaluega o puna’oa faalenatura ma le siosiomaga, o le suesuega o loo faatino o le a iloa ai pe na faapefea ona oo mai i Samoa le mongoose e pei ona iai le talitonuga o se manu fafine.
