Ua tuanai vaiaso e lua sa malolo ai le toatele o tagata faigaluega a le Malo auā malologa masani o le faaiuga o lena tausaga ma le amataga o lenei tausaga fou.

O le a toe foi ai auaunaga a le Malo i tulaga masani i le toe amatalia o galuega ma o le a toe tatala ai ma faitotoa o ofisa o matagaluega ma faalapotopotoga uma a le Malo.

Ua iai le talitonuga o le a toe foi ai ma auaunaga a konekarate ao lapisi i le tulaga masani, ona sa molimauina i le vaiaso ua mavae le fau o taga lapisi i tafāala ma ua fiafia ai ma taifau taaloa, ae avea ma faatiga fofoga, sau ai ma le nanamu o le manogi faalēmanuia o lapisi.

O taimi o aso malolo sa lipotia e le nusipepa o le Samoa Observer le tuai ona maua o lipoti o suega o gasegase i le vaega o le fale suesue poo le lab a le maota gasegase i Motootua, e mafua ona ua gaogao le aufaigaluega.

O lea gaogao e pei ona faailoa i lea lipoti e mafua ina ua lē fia galulue nisi o le aufaigaluega i aso malolo, ina ua latou maua le faaaliga e lē totogia i latou i aiaiga masani o aso malolo ae o le totogi masani.

Ua faailoa e le sui faatonu sili o le soifua maloloina i le nusipepa o aiaiga masani ia o le totogi o aso malolo a le komisi poo commission holidays.

O le a foia lea faafitauli sa tulai mai auā ua toe foi le auaunaga masani a le fale suesue o le matagaluega o le soifua maloloina i tulaga masani.